Cerita Berbahasa Aceh

Cerpan (Ceurita paneuk)

Baca !

DIKE ACEH

Oleh Hamdani, S.Pd.

            Nibak buleun maulod cit kajeut keu adat nyang jroh. Ureung Aceh that harok bak geupemulia uroe lahe rasul Muhammad pang ulee seugala nabi. Nyang brie syafaat uroe akhirat di blang padang masya ngon izin Allah. Manok gampong dan breuh baro kageusiap lhe buleun yoh goh teuka buleun rabiul awai. Kageupeusiap keu khanduri. Geupeugah le ulama awai-awai rayeuk that fala keu ureung nyang tem meuseulaweut nibak geupeumulia lahe janjongan alam nabi Muhammad. Pulom taniet seudekah brie makanan keu ureung fakir, miskin, aneuk yatim, ngon tahidang makanan keu teungku-teungku nyang baca seulaweut keu nabi. Rayeuk that fala baca seulaweut ke nabi Muhammad utosan Allah. Bah pih seulaweut nyan tabaca uroe atawa malam.

            Si Ramli ngon Teungku Balee karap tiep malam meuruno dike Aceh bak dayah Teungku Haji Usman. Seubab cit kalage biasa tiep thon aneuk miet beut bak dayah Teungku Usman sabe na undangan meudike maulod. U rata gampong nyang na lam keucamatan. Nacit kadang-kadang keunong undangan u kanto camat lam rangka khanduri maulod bak kanto. Nyang geu undang le Pak Camat lam rangka geusantuni aneuk yatim ngon fakir miskin.

            “Pajan teuma tapeugot acara dike Aceh bak sikula tanyoe pak guru ?,” tanyong si Syukri ngon sapat beut si Ramli aneuk murid Teungku Usman.

            “Rencana tonyo uroe Jum'at ukeu wate acara lomba azan, lam rangka tapeuringati maulod nabi, nacit tapeugot lomba muhazarah atawa dakwah teuntang seujarah syiar Islam,” jaweub Pak Guru Hamdani nyang kayem that jeut keu juri lomba peudato di sikula MIN.

            Bandum murid meuseumangat cukop pakat peugot acaranyan. Pulom si Bukhari that galak ikot lomba azan. Nyang seubago juri sabe-sabe Pak Iskandar guru Pendidikan Agama Islam.

            Nibak acara maulod di Aceh nakeuh seubago lage uroe raya bagi ureung Islam. Meriah rab saban ngon uroe raya puasa atawa uroe raya haji. Rame that ureung, chiek, putiek bandum geu langkah u meunasah atawa meusjid geujak intat khanduri maulod. Lheuh nyan geudengo dike Aceh nyang cukop indah. Sue-sue meualon-alon, lage peh geundrang nibak prang sabi. Syeh dike Aceh meuanggok-onggok meutikue tangah baca seulaweut ngon qasidah. Seujarah nabi dari ban lahe sampo syafaat di uroe akhirat geubaca le Teungku Zubir. Aneuk mit cu-cut murid Teungku Balee cukop seunang baca seulaweut ngon qasidah. Bak lingiek-lingiek watee meudike meujan-jan rhot kupiah.

Watee lheuh bandum baca seulaweut lheuhnyan geututop ngon baca doa. Lake berkat nibak Allah beumeutume syafaat di blang padang masya. Baro lheuhnyan pajoh khanduri geubagi saban rata. Nyan keuh nyoe kisah ureung Aceh bangsa gigeh peudong agama. Islam cukop that geujunjong kuta gampong peukong agama.   

1.      Makna kata payah (sukar)

Maulod             = maulid

Jroh                 = bagus, baik, elok

Rasul               = utusan Allah

Pang Ulee        = Penghulu, Pang Ulee Nabi ‘penghulu segala Nabi”

Harok              = suka

Syafaat            = syafaat Nabi dengan Izin Allah pada hari akhirat

Padang            = tempat yang luas, padang masya ‘tempat manusia dikumpulkan pada hari kiamat’

Manok             = ayam, manok gampong ‘ayam kampung,

Janjongan        = junjungan, janjongan alam ‘junjungan alam’

Seulaweut       = shalawat

Dike                = seni membaca puji-pujian kepada Allah, shalawat kepada rasul, dan sejarah Islam dengan ragam bahasa sastra yang indah lebih dikenal dengan nama dike Aceh

Teungku          = ustaz, kiyai

Ureung            = orang, ureung chiek ‘orang dewasa’

Putik               = buah muda, ‘di sini maksudnya orang muda’

Khanduri         = kenduri, sedakah makanan, khanduri maulod ‘sedakah makanan untuk orang banyak yang hadir pada peringatan maulid’

MIN                = singkatan dari Madrasah Ibtidaiyah Negeri

Muhazarah      = belajar ceramah atau pidato

Meualon-alon  = beralun-alun

Meuanggok-anggok  = berlenggak-lenggok     

Qasidah          = syair yang mengandung sejarah Islam dan nasehat

Lingiek            = goyang leher

Kupiah            = peci

Syeh Dike       = pemimpin grup dike Aceh

2.      Jaweub teumanyong

1.    Pakon ureung Aceh harok that geukhanduri maulod ?

2.    Peue-peue mantong geubaca watee ureung geumeudike Aceh ?

3.    Pat mantong biasajih di Aceh geupeugot acara khanduri maulod ?

4.    Ho mantong ureung meudike Aceh geu undang khanduri maulod ?

5.    Peue di gampong kah mantong khanduri maulod jino ?

6.    Pu fala geubrie le Allah keu ureung meuselaweut keu nabi Muhammad ?

7.    Acara peumantong geupuduek bak sikula lam geuperingati buleun maulod ?

8.    So nan geuh syeh dike Aceh lam ceurita di ateuh ?

9.    Peue na harok awakkah jeut meudike Aceh ?

10. Bak teumpat toh na geupeuruno dike Aceh ?    

3.      Baca ngon boh meukeusud lam dike Aceh di miyub nyoe !

  Hijrah Nabi
  Oleh Tgk. M. Thaib Abu Bakar

  Masa hijrah Nabi Muhammad

  Neutinggai teumpat Mekkah mulia

  Bak watee suboh Nabi beurangkat

  Dua ngon sahbat ngon Abu Bakar

Nabi hijrah peusiblah untong

Sehingga langsong bak saboh guha

Laju neutamong neujak meulindong

Meu untong-untong ngon Abu Bakar

Teukeudi Tuhan nyang po keurajeun

Teuka rambideun jirawe sutra

Bak pinto guha jiboh meureun-reun

Siulah bangon hantom so teuka

Nabi neu eh le lam guha batee

Kageumung ulee le Abu bakar

Uleu nyang jeuheuet jipeuna lage

Ji coh meuteunte sahbat saidina

Abu Bakar moe hana berbunyi

Geuhiro Nabi bek sampe jaga

Ie mata tijoh bak muka Nabi

Laju neusudi uleh saidina

Peue meularat sahbat jeut tamoe

Tapeugah jino laju beusigra

Wahe janjongan ulon that rugo

Uleu coh jaro leupah that bisa

Lheuh nyan neutawa sigra le nabi

Puleh Tuhan brie ngon siklep mata

Muwo seumangat sehat keumbali

Ie babah Nabi jeut keupenawa

 Di cicak puteh jeuheuet sileupah

 Subra jipeugah Nabi lam guha

 Pasukan kafe hate meudarah

 Teusia payah rugo teunaga

 Nabi jimita hana meuteumeung

 Leupah that bingong hate lam dada

 Jipasang unta gisa u gampong

 Tuhan peulindong Nabi bak bala

 (Dikutip dari buku Bahasa Nenek Moyang (Indatu) Orang Aceh karya Hamdani, S.Pd.)

Cerita Berbahasa Aceh

Cerpan (Ceurita paneuk)

Baca !

JAK DEUNGO DAKWAH

Oleh Hamdani, S.Pd.

Si Nazar ngon aneuk miet nyang siumu jih teungoh jimeupakat jak bak dakwah. Dakwah lam basa Aceh geukheun nan peudato. Peudato cit ka lazem lam udep ureung Aceh sebago cara geupeusampo peusan atawa amah-amanah dari ulama. Dakwah gekheun cit ngon ceuramah. Lam gampong di Aceh rap tiep watee na peudato. Miseujih na dakwah lam geusambot buleun maulod, dakwah thon baro Islam atawa hijriah, dakwah sambot buleun ramadhan, dakwah uroe raya nyan geukheun khutbah uroe raya. Nyan keuh lagenyan yang geukheun peudato di tanoh Aceh. Peudatonyan na geupeuduek di meunasah, meusjid, dayah, atawa bak tanoh lapang teubuka. Pereute panitia ka geumesapat bandum u teumpat peuduek dakwahnyan. Aneuk muda pih ikot meusapat cit. Awak mudanyan nakeuh nyang peugot mimbar atawa pedium. Lheuh seuleuso mimbar baro jihiah ngon keureutah  ilayang. Laen nibaknyan mimbar ji pasang ija pengui peulami. Cukop that seumarak dakwah malamnyan. 

“Hai peue ikah kajak bak peudato eunteuk malam ?," tanyong si Nazar bak si Tarmizi ngon sapat beut jih.

“Lon hana kujak, kareuna hana peng sagai. Enteuk hana ngon blo jagong reuboh ngon jagong keutuem,“ jaweub si Tarmizi.

Macam-macam bago peukateun ureung jak bak dakwah. Na nyang deungo dakwah sira pajoh jagong teutot, na nyang puliek kacang reuboh, na nyang galak keu qasidah irama padang pasir, si Aisyah galak beut qari. Nyang peunteng aso dakwah tasimak beugot. Beujeut ke haba peuingat ngon nasehat keu donya akhirat. Ileume nyang tadeungo bak dakwah beuta amai ngon tapeutimang.

“Lon kujak ngon si Hamdani, lhe ngon ma chiek jih,” peugah si Nazar bak si Tarmizi. 

Si Nazar galak jih that dakwah malamnyan, seubab nyang baca al-Qur’an Teungku Abdul Hadi nyang juara MTQ di tingkat provinsi.

“Hai Nazar, mameh that sue pak guru geutanyoe, nyang ba acara protokol nyan Pak Razali keupala sikula tanyoe,” kheun si Tarmizi bak si Nazar watee meurumpok bak teumpat peudato. Akhejih si Nazar teukeujot jih that.

“Peue cit kapeugah hana kajak bak dakwah malamnyoe ?," tanyong si Nazar lom.

“Geujak intat lemak lon, meunyo jagong reuboh lon ba atra geupot di likot rumoh,” jaweub si Tarmizi.

“Nyang ceuramahnyan Teungku Yusri Puteh, bek awakkah hana katuri,” kheun si Nazar ulee rombongan. Nyang cukop teupana keu peudato teungku ceuramah.

Aso peudatonyan antara laen “Teungku-teungku, ummi-ummi, adek-adek bandun nyang lon hormati.  Lam rangka tasambot buleun puasa atawa buleun suci ramadhan nyoe. Mari geutanyoe tatingkat iman ngon takwa kepada Allah. Miseujih shalat haroh seumaken jeumot. Beuna berjamaah di meusjid. Meunancit ngon shalat sunat beumeutamah lom. Malam ramadhan  tatunaikan shalat sunat lage teuraweh miseujih. Mari geutanyoe tapeugleh ate ngon pikeran lam tasambot buleun mulianyoe. Di antara buleun dalam sithon nakeuh buleun nyang paleng mulia nyang geubohnan buleun ramadhan. Lam buleun ramadhan nyoe na malam nyang paleng mulia yaitu malam Lailatul Qadar. So mantong ureung Islam nyang seunang ate ngon troh buleun ramadhan, Allah geupeu ampon dasya ureungnyan ngon geupeumerdeka dari apui nuraka ….” Seureuta aso ceuramah nyang panyang laen lom.

“Peue nyang na awakgata ingat mantong peusan ceuramah malam baroe ?,” tanyong Pak Guru.

“Buleun ramadhan beujemot shalat ngon puasa,” jaweub si Nazar.

“So nyang jeut peudoto ci maju u keu glah, uronyoe peulajaran geutanyoe meuruno peudato atawa dakwah lam peulajaran bahasa Indonesia,” sambong lom Pak Guru.

“Lon maju peudato,” jaweub si Hamdani nyang galak that ceuramah lage teungku.

            1.      Makna kata payah (sukar)

        Peudato            = pidato, ceramah

        Meunasah         = surau

        Peureute            = partai, kelompok

Seumarak         = meriah

Peungeui           = menghias, peungeui peulami ‘menghias pelaminan

Jagong              = jagung, jagong reuboh ‘jagung rebus’

MTQ                = singkatan dari Musabaqah Tilawatil Qur’an

Apui                 = api, apui nuraka ‘api neraka’

Buleun              = bulan

Sambot            = sambut, tasambot ‘kita menyambut’

Teuraweh         = tarawih

2.      Jaweub teunanyong

1.      Kiban nyan geukheun ngon dakwah ?

2.      Peue nan dakwah geukhen lam basa Aceh ?

3.      So mantong nan aneuk miet lam ceurita di ateuh nyan harok that jak deungo dakwah ?

4.      So nan teungku nyang baca al-Qur’an lam ceurita nyan ?

5.      So nan nyang ba acara atawa protokol bak dakwah nyan ?

6.      So nan teungku nyang ceuramah nyan ?

7.      Peue mantong aso ceuramah teungku nyang dakwah lam ceuritanyan ?

8.      So-so nan teungku di gampong kah nyang kayem ceuramah di meunasah ?

9.       Peue awakkah na harok jeut keu ureung ceuramah ?

10.   Kiban cara tameuruno dakwah beu carong ? 

3.      Baca dike Aceh di miyub nyoe ! 

Nyang phon ingat keu Tuhan

Kedua rakan ingat ke dasya

Ingat keu dasya tomoe beukayem

Teungoh takhem-khem ka neubrie bala

             Asai bak tanoh muwoe bak tanoh
            Tuhan peuteungoh u padang masya
            Teuma nyang keupeut ingat keu kubue
            Taduek teuku-ku taroe ie mata

            Taduek sidro ngon teuh pi tan
            Sidro hai rakan dalam keureunda
            Supot leupah that arat pi sangat
            Leumah ta-lihat apui neuraka

Cerita Berbahasa Aceh

Cerpan (Ceurita paneuk)

Baca !

JAK BEUT U DAYAH

Oleh Hamdani, S.Pd.

            Dayah nakeuh saboh teumpat meununtut ileume donya ngon akhirat. Jameun dile kon dayah kameusyehue u lua nangroe. Bak mata donya dayah dari jemeun indatu geutanyoe jithe harom ngon nan ulama. Lage nan miseujih Teungku Chiek Awe Geutah sidro ulama Aceh nyang jak u tanoh suci Mekkah tuntut ileume bak jalan Allah. Lheuh nyan teuma gepuwo u tanoh Aceh ileume nyan geuperuno murid-murid nibak dayah. Nyan keuh seubabnyan dayah Teungku Chiek Awe Geutah sampo an jino mantong jithe nan le ureung luwa nanggroe. Bak dayah gure geudidek ulama-ulama sebago ahli wareh para nabi. Nyan beu tateupu le geutanyoe nyang mantong cut-cut nakeuh ileume agama Islam nyoe cukop that peunteng.

            “Pu cita-cita gata hai nyak Amir ?,” tanyong Pak Guru.

Na nyang ureung cita-cita galak keu guru, keurija kanto, camat, bupati, meukat baje atawa laen-laen.

            “Lon galak atawa harok that jeut keu teungku, lage almarhom Teungku Abuya Muda Waly nyang tinggai droneuhnyan di Labuhanhaji,” jaweub si Amir.

            Nyoe cita-cita awak gata jeut keu teungku atawa ulama nyan that mulia nibak Allah. Jeut tapeudong syariat Islam nyang kaffah di tanoh Aceh nyoe. Lage miseujih na Teungku Jafar nyang tinggai di gampong bineh blang. Jino kerja droneuhnyan nibak kanto Wilayatul Hisbah (WH). Tiep uroe geurawon gampong ngon kuta gepeutegak hukom Islam. Teungku Jafar nakeuh sidroe ulama nyang na ijazah guree dayah seureuta teuma droneuhnyan nakuliah jurusan Syariah nibak kampus universitas Islam. Lam basa Arab geuboh nan Ma’had Ali atawa Sikula Tinggi Agama Islam.

            Lam tapeuteugak syariat Islam nibak tanoh Aceh nyoe peurle keureuja bandum gulongan. Beusapue pakat, beusapue haba. Lage miseujieh na geupeugot muzakarah atawa duek pakat ulama ngon geupuroh seurta geu undang Pak  Bupati, Pak Camat, Teungku Imuem gampong, ceuredek pandai, ngon aneuk muda. Nak saban tanggong jaweub ngon sapu pakat dalam talawan buet maksiet. Ngon sebab sapu pakat nyan jeut keusaboh tanggong jaweub saban-saban nibak gampong maseng-maseng lam tapeuteugak syariat Islam.

            “Pak guru, kiban cara teuma mangat jeut keu ulama nyan ?," tayong si Hasan aneuk Teungku Imuem gampong meunasah bineh blang.

            “Nyan cita-cita mulia, Hasan jeut keu ganto Abi Imuem gampong meunasah bineh blang."

"Cara jih jak beut u dayah. Jak beurangkat u Samalanga. Di sinan na Abu MUDI. Na meungaji na madrasah,” jaweub Pak Guru.

        Nibak dayah MUDI Samalanga nyan na meuribe-ribe aneuk miet beut. Jino teungoh geupeuruno geudidek sebago seunimoh ulama. Leubeh that lom meusyeuhu ngon trang nan meucahaya seubab nibak dayah MUDI jino kageubuka kuliah. Ngon geutipek nan nyang that lagak nakeuh Institut Agama Islam (IAI) Al-Aziziyah Samalanga. Nak meuhase lahe ulama ngon ceuredek pandai donya ngon akhirat.

            Atawa jak u dayah Teungku Mustafa Puteh nyang geusapa ngon nan droneuhnyan Abu Paloh Gadeng. Jeut cit jak menuntut keudeh bak Teungku Abu Idi Cut. Seubab ileume agama Islam nyan cukop that peunteng lam ta arong udep donya ngon akhirat. Masa dile nibak tanoh Aceh nyoe that rame meutabu ulama. Nyan keuh sebab Aceh nyoe geusebot nan Seuramoe Mekkah tanoh nyang ceudah rame ulama.

1.      Makna kata payah (sukar)

Dayah                     = Lembaga Pendidikan Islam, Balai pengajian, tempat belajar agama Islam, Dayah Tinggi = Ma’had Ali ‘Sekolah Tinggi Agama Islam, Universitas Islam’

Meusyeuhu                     = tersohor, terkenal, masyhur, meusyeuhu nan ‘terkenal nama’

Ahli wareh                      = ahli waris, pewaris, yang mewarisi, wareh Nabi ‘ahli waris Nabi’

WH                                = Wilayatul Hisbah ‘polisi syariat Islam’

 Kaffah                           = menyeluruh, lengkap, sempurna

 Muzakarah                    = rapat para ulama

 Mantong cut-cut          = masih kecil, masih anak-anak, aneuk mit cut-cut ‘anak kecil, bocah’

 Maksiet                         = maksiat, perbuatan jahat

 Madrasah                      = sekolah Islam

Gampong                        = kampung, desa

Sapu pakat                     = sepakat, sama ide

Ceureudek pandai           = cerdik pandai, cendekiawan, ilmuan

Arong                        = arung, arungi, ta arong udep ‘mengarungi hidup, menjalani kehidupan’

MUDI                             = singkatan dari Ma’hadal Ulum Diniyah Islamiyah       

Lagak                             = bagus, elok

Seuramoe                       = serambi, seuramoe Mekkah ‘serambi Mekkah’

Meutabu                         = bertabur, banyak, meutabu ulama ‘banyak ulama’

Ceudah                           = bagus, elok

2.      Jaweub teunanyong

1.      Pueu seubab dayah jameun dile jithe u nanggroe luwa ?

2.      Peue seubab peunteng that menuntut ileume u dayah ?

3.      So nan ulama Aceh nyang jak tuntut ileume sampo u Mekkah ?

4.      Na galak atawa harok droekeuh jeut keu ulama ?

5.      Peue tugaih keurija Teungku Jafar Wilayatul Hisbah tiep uroe ?

6.      Peue tujuan duek pakat ulama Aceh ?

7.      Kiban cara tapeuteugak syariat Islam nibak tanoh Aceh ?

8.      Keupue Aceh geseubot nan Seuramoe Mekkah ?

9.      Kiban cara jih nak jeut keu ulama ?

           10.Kiban cara tapemulia ulama sebago wareh Nabi ?

3.      Meukeusud kemeung tupeue peue ngon kata tanyong di miyub nyoe !

a)  Pakriban leumah pike bak gata  syariat Islam beuteugak nibak tanoh Aceh ?

    ‘Bagaimana pendapatmu agar syariat Islam tegak kokoh di tanah Aceh ?’

b)  Peue di keucamatan nyan na dayah rayeuk ?

     ‘Apa di kecamatan itu ada dayah besar ?’

c)  Pakon dayah jeut keutempat nyang cukob peunteng di Aceh ?

     ‘Kenapa dayah menjadi tempat yang sangat penting di Aceh ?’

4.      Baca qasidah Aceh di miyup nyoe ngon boh makna lam bahasa Indonesia !

Mita Ileume

Awai mula phon deungon Bismillah

Jaroe mak ngon yah kamoe com sigra

Meubeu-oet gaki meuayon langkah

Keudeh u dayah ileume meumita

Lon tinggai gampong, poma ngon ayah

Ulon cok langkah lam supot buta

Lon mita gure mita ijazah

Lon jak u dayah seutot ulama

Lethat ulama meusyeuhu di sinan

Lam dayah nyan kaji agama

Geupeubeut kitab ngon tafsir Qur’an

Hana hai rakan geuharab jasa

Ngon ie mata roe kamoe meulake

Keu bandum gure jioh bak bala

Beujioh fitnah deungon buet keuji

Nebrie ya Rabbi gure seujahtra

Beuthat kamoe duek bak bilek rangkang

Si ulah sang-sang dalam istana

Bah pih kamoe eh bak tika beukah

Si ulah-ulah bak kaso busa

Beuthat dikamoe lage nyo malam

Seumangat juang hantom na reuda

Dak tuboh mate iman bek leukang

Agama Tuhan lam kubu taba